Një nga veprat më të çmuara të piktorit impresionist Pierre-Auguste Renoir, e titulluar “Les Poissons”, është vjedhur nga ambientet e Fondacioni Magnani-Rocca në Mamiano di Traversetolo, pranë Parmës.

Lajmi u raportua fillimisht nga media italiane dhe më pas u konfirmua nga burime zyrtare, ndërsa autoritetet kanë nisur menjëherë hetimet për zbardhjen e plotë të ngjarjes.

Sipas informacioneve paraprake, bëhet fjalë për një pikturë vaj në telajo, e realizuar rreth vitit 1917, me një vlerë që arrin në disa milionë euro. Vepra konsiderohej ndër më të rrallat e artistit që ruheshin në një koleksion të përhershëm në Itali.

Dyshohet se autorët kanë hyrë disa ditë më parë në ambientet e vilës ku ndodhet koleksioni – e njohur si “Villa dei Capolavori” – dhe kanë arritur të marrin pikturën pa u zbuluar menjëherë.

Hetimet po drejtohen nga karabinierët italianë, të cilët po punojnë për identifikimin e autorëve dhe rikuperimin e veprës së vjedhur.

Fondacioni Magnani-Rocca është një nga institucionet më të rëndësishme artistike në Itali, ku ruhen kryevepra të artistëve të mëdhenj si Claude Monet, Paul Cézanne, Peter Paul Rubens dhe Francisco Goya.

Ngjarja ka ngritur shqetësime serioze për sigurinë e veprave të artit në institucionet kulturore, ndërsa rikuperimi i pikturës mbetet tashmë prioritet për autoritetet italiane.