Tottenham Hotspur ka vendosur të ndërpresë bashkëpunimin me trajnerin Igor Tudor, duke i dhënë fund një aventure që zgjati vetëm 45 ditë në krye të skuadrës londineze.

Lajmi është konfirmuar nga vetë klubi, i cili theksoi se ndarja ka ardhur “me marrëveshje të përbashkët”, pas një periudhe të shkurtër dhe rezultateve jo bindëse.

Gjatë drejtimit të tij, Tudor udhëhoqi ekipin në shtatë ndeshje, ku arriti vetëm një fitore. Suksesi i vetëm erdhi në UEFA Champions League përballë Atlético Madrid, por pa mundur të sigurojë kualifikimin në çerekfinale.

Në Premier League, situata rezultoi edhe më problematike, me Tottenham që regjistroi vetëm një barazim dhe mbeti në zonat e fundit të renditjes, vetëm një pikë mbi West Ham United.

Një nga momentet më të diskutueshme të kësaj periudhe ishte vendimi për të zëvendësuar portierin Kinsky që në minutën e 17-të në ndeshjen ndaj “Colchoneros”, një zgjedhje që shkaktoi reagime të forta në media dhe mes tifozëve.

Largimi i Tudor vjen në një moment delikat për klubin, i cili tashmë duhet të gjejë një zgjidhje të shpejtë për stolin, në përpjekje për të shmangur një sezon zhgënjyes.