Vijon sërish protesta në fshatin Lumas të Kuçovës për burimin e Sinecit.
Një konflikt ka ndodhur sot në Kuçovë, mes banorëve të fshatit Lumas që kërkojnë ruajtjen e burimit të Sinecit dhe banorëve të fshatrave Vodë dhe Krekëz që janë pro ndërtimit të Ujësjellësit.
Sherri ka përshkallëzuar deri në përplasje fizike mes banorëve të disa fshatrave.
Banorët e Lumasit janë kundër shfrytëzimit të burimit të Sinecit për ndërtimin e ujësjellësit, ndërsa kanë nisur prej disa ditësh grevën e urisë. Banorët e Lumasit shprehen se nuk janë kundër ndërtimit të Ujësjellësit, por ai të mos ndërtohet te burimi i tyre.
Nga ana tjetër, banorët e fshatit Vodës kërojnë që të ndërtohet ujësjellësi në burimin e Sinecit, që është zonë e mbrojtur. Kjo ka bërë që banorët e dy fshatrave të përplasen fizikisht mes tyre.
“Ne duam që të kemi ujë, duam ujësjellësin, ata e duan për të vaditur, ne nuk kemi ujë që të pijmë. Ne nuk kemi ujë, jemi shumë fshatra, jemi llafosur me deputetin dhe na kanë thënë që do të na sjellin ujë”, shprehen banorët.
Bashkia Kuçovë ka deklaruar më herët se ndërtimi i ujësjellësit nuk do të ndikojë në mbylljen përfundimtare të burimit të Sinecit.
