Trupi i pajetë i 78-vjeçarit Gezim Vija u zbulua mëngjesin e së enjtes nga një punonjës i postës që shpërndante pensionet. Kur ai nuk mori përgjigje nga Vija, njoftoi fqinjët, të cilët më pas hapën derën e shtëpisë dhe gjetën trupin e të moshuarit në një nga dhomat.

Ekspertiza mjeko-ligjore ka konstatuar se viktima kishte një plagë të thellë në kokë, e shkaktuar nga një mjet i fortë, që i ka sjellë vdekjen. Dyshohet se para këtij akti, viktima dhe autori kanë pasur një përleshje.

Policia dhe ekspertët janë rikthyer në vendin e ngjarjes për hetime të mëtejshme, por mjeti i përdorur për krimin ende nuk është gjetur. Marrja në pyetje e familjarëve dhe të afërmve po vazhdon, megjithatë deri tani nuk ka pasur informacione që të orientojnë autoritetet drejt identifikimit të autorit.