Kryeministri Edi Rama zhvilloi sot një takim me kryebashkiakët socialistë, në kuadër të turit “Për punët e Shqipërisë”, ku u diskutuan prioritetet dhe projektet që synojnë përmirësimin e shërbimeve lokale dhe menaxhimin e emergjencave.

“Kemi nisur një proces me ekipet e ministrive për të parë situatën në lidhje me prioritetet dhe problematikat dhe për të pasur një lexim të plotë të çdo sektori në kontekstin e kësaj faze të qeverisjes. Për këtë arsye menduam që të bëjmë edhe këtë takim,” tha Rama.

Kryeministri theksoi rëndësinë e vënies në dispozicion të bashkive të një flote të re automjetesh që do të ndihmojë në pastrimin e kanaleve dhe përgatitjen për sezonet e mëtejshme, duke lehtësuar proceset e ujitjes dhe reduktuar pasojat e përmbytjeve. “Projekt që do ta finalizojmë në muajt në vijim,” shtoi ai.

Një tjetër pikë e rëndësishme e diskutuar ishte finalizimi i sistemit të adresave, ku Rama u kërkoi bashkive të angazhohen maksimalisht dhe paralajmëroi penalitete për ata që nuk bashkëpunojnë. “Finalizimi do të kërkojë angazhimin e individëve dhe në pikat e planit të punës do të ketë një pikë për penalitet për ata që nuk bashkëpunojnë me pushtetin vendor për t’u bërë pjesë e sistemit të adresave,” përfundoi kryeministri.

Takimi i sotëm synon të forcojë koordinimin mes qeverisë dhe pushtetit vendor, duke garantuar implementimin e projekteve strategjike për qytetarët.