Një problem teknik ka prekur misionin hapësinor Artemis II, pasi sistemi i tualetit në kapsulën Orion ka dalë pjesërisht jashtë funksionit, duke krijuar vështirësi për ekuipazhin gjatë kthimit drejt Tokës.

Sipas NASA, defekti është konfirmuar në ditën e gjashtë të misionit 10-ditor. Në bord ndodhen astronautët Reid Wiseman, Victor Glover, Christina Koch dhe kanadezi Jeremy Hansen.

Për shkak të këtij problemi, ekuipazhi është detyruar të përdorë pajisje alternative, përfshirë veshje të posaçme higjienike dhe një sistem rezervë të njohur si “Collapsible Contingency Urinal”, i projektuar për situata emergjente. Aktualisht, tualeti mund të përdoret vetëm pjesërisht.

Kjo nuk është hera e parë që raportohen vështirësi teknike gjatë këtij misioni. Që prej nisjes më 1 prill nga Kennedy Space Center, janë evidentuar disa probleme, përfshirë edhe bllokime të tubacioneve nga formimi i akullit.

Në rast se sistemi dështon plotësisht, astronautët mund të detyrohen të përdorin metoda më të thjeshta për menaxhimin e mbetjeve, të ngjashme me ato të përdorura gjatë misioneve Apollo.

Misioni pritet të përfundojë më 10 prill, kur kapsula të ulet në Oqeanin Paqësor, pranë brigjeve të Kalifornisë.