Në një takim të zhvilluar këtë të martë me drejtuesit e Drejtorisë Vendore të Policisë Tiranë, shefat e komisariateve dhe të sektorëve nën varësi të DVP-së, Drejtori i Përgjithshëm i Policisë së Shtetit, Skënder Hita, theksoi nevojën për rritje të prezencës policore dhe profesionalizmit në të gjitha nivelet e shërbimit.

Gjatë diskutimeve, Drejtori Hita kërkoi masa konkrete për parandalimin dhe goditjen e veprave kriminale, përfshirë trafikun dhe shitjen e lëndëve narkotike, kultivimin e kanabisit, krimet ekonomike, lojërat e fatit, armëmbajtjen pa leje, si dhe krimet mjedisore që prekin hapësirat publike dhe ndotjen e ambientit.

Veçanërisht u theksua rëndësia e sigurisë rrugore, kibernetike dhe në shkolla, ndërsa u kërkua reagim i shpejtë ndaj shqetësimeve dhe denoncimeve të qytetarëve. Drejtori Hita nënvizoi se besimi i qytetarëve fitoret vetëm me profesionalizëm dhe sjellje të drejtë të punonjësve të Policisë.

Ai bëri thirrje që drejtuesit të mbështesin stafin në terren, të motivojnë punonjësit dhe të vlerësojnë përkushtimin e tyre të përditshëm, duke theksuar se angazhimi i vazhdueshëm është kyç për rritjen e parametrave të sigurisë në kryeqytet.

Ky takim tregon qartësisht se Policia e Shtetit synon një rritje të kontrollit në terren dhe një praninë më aktive në të gjitha zonat e Tiranës, për të garantuar siguri maksimale për qytetarët.