Konfindustria ka dalë me një apel urgjent drejt qeverisë shqiptare, duke vlerësuar se përkeqësimi i situatës në Gjirin Persik dhe rritja e çmimeve të karburanteve po krijon pasoja dramatike për ekonominë vendase. Sipas analizave të saj, një rritje prej 30% e çmimit të derisotëm të karburanteve mund të sjellë inflacion mbi 6% dhe të ulë Prodhimin e Brendshëm Bruto me 2,8-3%, duke rrezikuar hyrjen e Shqipërisë në recesion gjatë vitit 2026.

Konfindustria kërkon ndërhyrje të menjëhershme në tri drejtime:
1. Ulja e barrës fiskale mbi karburantet dhe taksat vjetore të automjeteve, duke i përafruar me mesataren rajonale. Sipas saj, masa aktuale e reduktimit të akcizës me 20% është e pamjaftueshme, sidomos kur çmimi i naftës pritet të arrijë 220 lekë/litër.
2. Transformimi i Bordit të Transparencës në një Ent Rregullator të Karburanteve me kompetenca të përhershme, për të parandaluar spekullimet dhe kartelizimin në treg.
3. Krijimi i një operatori me kapital shtetëror në tregun e shumicës dhe pakicës së karburanteve, një hap strategjik duke pasur parasysh se ky sektor llogaritet me një qarkullim vjetor prej 2 miliard dollarësh, afër 10% të PPB-së.

Konfindustria nënvizon se Shqipëria është i vetmi shtet në rajon që nuk ka ndërmarrë masa konkrete lehtësuese për qytetarët dhe bizneset përballë krizës së karburanteve, duke e bërë urgjente një reagim të koordinuar nga ekzekutivi.