Nga ushqimi i përditshëm deri te çrregullimet më serioze shëndetësore, ekspertët shpjegojnë pse ndodh që jashtëqitja të jetë më e madhe se zakonisht dhe kur kjo duhet të ngrejë shqetësim.

Në shumë raste, jashtëqitja e madhe apo e fortë lidhet me kapsllëku dhe problemet me tretjen. Mungesa e fibrave në dietë, hidratimi i pamjaftueshëm dhe shtyrja e nevojës për zbrazje bëjnë që ajo të bëhet më e thatë, më kompakte dhe më e vështirë për t’u eliminuar.

Ekspertët theksojnë se disa faktorë kryesorë ndikojnë në këtë fenomen: ushqimi i varfër në fibra, dehidratimi, mungesa e aktivitetit fizik, si dhe ndryshimet në rutinën e përditshme. Edhe përdorimi i disa medikamenteve mund ta përkeqësojë situatën, duke çuar në kapsllëk të vazhdueshëm.

Në raste të caktuara, problemi mund të lidhet edhe me çrregullime si sindroma e zorrës së irrituar apo me disfunksion të muskujve të legenit, që e bëjnë më të vështirë procesin e zbrazjes.

Megjithatë, specialistët paralajmërojnë se ndonjëherë pas kësaj dukurie mund të fshihen probleme më serioze, si bllokime në zorrën e trashë. Shenjat që kërkojnë vëmendje të menjëhershme janë: prania e gjakut në jashtëqitje, dhimbje të forta barku, temperaturë, të vjella apo pamundësia për të nxjerrë gazra.

Për të parandaluar dhe lehtësuar këtë problem, rekomandohet një dietë e pasur me fibra, konsum i mjaftueshëm uji (1.5–2 litra në ditë), aktivitet fizik i rregullt dhe shmangia e shtyrjes së nevojës për zbrazje. Përdorimi i medikamenteve laksative duhet bërë vetëm me këshillën e mjekut.

Në shumicën e rasteve, bëhet fjalë për një problem të përkohshëm, por nëse simptomat vazhdojnë ose përkeqësohen, vlerësimi mjekësor është i domosdoshëm.