Deputeti i Partisë Demokratike, Belind Këlliçi, ka reaguar fuqishëm lidhur me pritjen para mbledhjes së nesërme të Kolegjeve të Bashkuara, ku pritet të shqyrtohet vendimi i ndërmjetëm i kryetarit të Gjykatës së Lartë, Sokol Sadushi, mbi masat e sigurimit personal për kryebashkiakun e arrestuar të Tiranës, Erion Veliaj.

Përmes një postimi në rrjetet sociale, Këlliçi shprehet se Sadushi po tenton të lehtësojë masën e paraburgimit për mikun e tij, pavarësisht se ndaj Veliajt rëndojnë 13 akuza për 5 vepra të rënda penale.

“A mund të ndodhë që në vendin me qeverinë më të korruptuar në Europë… ta nisë ditën kryegjyqtari me idenë për të liruar mikun e tij me 13 akuza në kurriz?! Këtë do të bëjë nesër Sadushi i rilindjes,” shkruan Këlliçi, duke paralajmëruar se ky vendim mund të përbëjë “niveli më spektakolar i kapjes së shtetit në historinë tonë.”

Ai fton qytetarët të reagojnë, duke bërë thirrje për një mobilizim më 17 prill para “zyrës së krimit e korrupsionit” për të mbrojtur Shqipërinë nga abuzimi me drejtësinë.