Tensionet në Lindjen e Mesme mbeten të larta, edhe pas arritjes së armëpushimit dyjavor midis Shteteve të Bashkuara dhe Iranit, ndërmjetësuar nga Pakistani. Lajmi për rihapjen e Ngushticës së Hormuzit u prit me lehtësim nga tregjet globale, por realiteti në terren tregon se situata mbetet e brishtë.

Sulmet e Iranit në shtetet arabe të Gjirit Persik dhe vazhdimi i operacioneve izraelite në Liban kundër Hezbollahut po sfidojnë drejtpërdrejt armëpushimin. Trupat e Gardës Revolucionare Islamike kanë vendosur një sistem tarifash dhe kode lejeje për kalimet në ngushticë, duke vendosur shtetet e Gjirit përballë një kosto ekonomike të lartë, ndërsa konsumatorët globalë do të përballojnë vetëm një pjesë të vogël të faturës.

Megjithatë, çështja më kritike mbetet programi bërthamor i Iranit dhe rezervat e tij prej 440 kilogramë uraniumi të pasuruar në 60%. Ndërsa SHBA-ja kërkon ndalimin e pasurimit, Irani kërkon negociata mbi nivelin e tij. Ekspertët paralajmërojnë se kjo pikë nuk mund të zgjidhet përmes një armëpushimi të përkohshëm.

Vëzhguesit ndërkombëtarë thonë se tri elemente do të vendosin fatin e armëpushimit: stabiliteti ushtarak në Liban, menaxhimi i Ngushticës së Hormuzit dhe një marrëveshje për programin bërthamor. Sipas Guntram Wolff, kjo është një test i fuqisë asimetrike të Iranit dhe një sfidë e madhe për rolin udhëheqës të SHBA-së në rendin global.

Ndërsa ditët e ardhshme do të tregojnë nëse ky armëpushim do të shndërrohet në paqe të qëndrueshme apo thjesht një pushim i shkurtër në një luftë që nuk ka përfunduar, e gjithë bota i mban sytë nga Lindja e Mesme.