Në Asamblenë e Partisë Socialiste në Vlorë, kryeministri Edi Rama deklaroi se vendi po regjistron rritje të ndjeshme të turizmit dhe të ardhurave ekonomike, duke theksuar se këto zhvillime shpesh nuk pasqyrohen në perceptimin publik.

Ai u ndal veçanërisht te procesi i integrimit europian, duke e cilësuar si vendimtar ruajtjen e ritmit të reformave dhe miratimin e ligjeve të lidhura me negociatat me Komisioni Evropian.

Rama theksoi rëndësinë e shumicës parlamentare, duke e cilësuar si jetike për vazhdimin e procesit. “83 mandatet nuk janë për pushtet, por për shtetndërtim dhe për të mos humbur një shans historik”, u shpreh ai.

Kryeministri shtoi se vonesat në vendimmarrje mund të rrezikojnë procesin e integrimit dhe se Shqipëria, sipas tij, duhet të ruajë ritmin në përmbushjen e detyrimeve të negociatave.

Ai bëri gjithashtu thirrje për forcim të mëtejshëm të strukturave të Partisë Socialiste në të gjitha bashkitë e vendit, duke e konsideruar këtë si pjesë të konsolidimit politik dhe institucional në funksion të objektivave të integrimit europian.