Kreu i Partisë Demokratike, Sali Berisha, ka deklaruar se ndaj protestuesve të opozitës gjatë tubimit të mbrëmjes së kaluar është përdorur një substancë e fortë spraji, të cilën ai e cilëson si të ngjashme me ato që përdoren për neutralizimin e kafshëve të egra.

Berisha ka publikuar edhe një imazh të një spraji me piper, duke pretenduar se ai është përdorur nga forcat e rendit gjatë ndërhyrjes për shpërndarjen e protestës.

Sipas tij, përdorimi i kësaj substance përbën shkelje të rëndë dhe bie ndesh me normat ndërkombëtare, ndërsa e ka cilësuar veprimin si “krim”.

Ai ka deklaruar gjithashtu se goditjet me spraj kanë qenë selektive, duke përmendur disa nga drejtuesit dhe deputetët e Partisë Demokratike që, sipas tij, janë prekur gjatë ndërhyrjes, mes tyre Flamur Noka, Luçiano Boçi, Klevis Balliu, Ivi Kaso, Blendi Himçi dhe Aulon Kalaja.

Ngjarja vjen pas protestës së organizuar nga opozita, e cila u shoqërua me tensione dhe ndërhyrje të forcave të policisë për të shpërndarë turmën. Policia ende nuk ka dhënë një reagim të detajuar mbi këto pretendime.