Vendet e Bashkimit Evropian kanë arritur marrëveshje për të zhbllokuar një paketë financiare prej 90 miliardë eurosh për Ukrainën, si dhe për të miratuar një raund të ri sanksionesh ndaj Rusisë, pas heqjes së kundërshtimit nga Hungaria.

Sipas diplomatëve të BE-së, fondet synojnë të mbështesin nevojat urgjente ekonomike dhe ushtarake të Ukrainës, në një kohë kur lufta me Rusinë vijon pa një zgjidhje të afërt.

Në të njëjtën kohë, është miratuar edhe paketa e 20-të e sanksioneve të BE-së ndaj Moskës, e cila pritet të rrisë më tej presionin ekonomik mbi Kremlinin.

Marrëveshja u arrit pas një ngërçi disa mujor, i lidhur edhe me mosmarrëveshjet mes Budapestit dhe Kievit për furnizimet me energji përmes tubacionit “Druzhba”, që kalon në territorin ukrainas.

Sipas Presidencës së BE-së, vendimi pritet të formalizohet nga të 27 shtetet anëtare përmes procedurës me shkrim, e cila do të përfundojë brenda ditës së nesërme.