Policia e Tiranës ka vijuar operacionin e koduar “Fati i lojërave”, duke goditur një tjetër rast të organizimit të lojërave të fatit në mënyrë të kundërligjshme në zonën e Kombinatit.

Sipas njoftimit zyrtar, në ambientet e një lokali bastet sportive zhvilloheshin përmes kompjuterëve dhe telefonave celularë. Gjatë kontrollit, uniformat blu arrestuan në flagrancë administratorin e lokalit, 28 vjeç, si dhe një punonjës 30-vjeçar.

Gjatë operacionit u sekuestruan pajisjet që përdoreshin për këtë aktivitet, përfshirë celularë dhe kompjuterë, të cilët shërbenin për vendosjen e basteve në mënyrë të paligjshme.

Sipas Policisë, aksioni është pjesë e kontrolleve të vazhdueshme në terren për parandalimin dhe goditjen e aktivitetit të lojërave të fatit jashtë kuadrit ligjor.

Materialet procedurale i janë referuar Prokurorisë për vijimin e hetimeve, ndërsa po punohet për identifikimin e personave të tjerë të përfshirë në këtë veprimtari.