Një incident i rëndë është regjistruar në orët e para të mëngjesit në Bulqizë, ku automjeti i gazetarit Sami Curri është përfshirë nga flakët dhe është shkatërruar pothuajse plotësisht.

Sipas informacioneve paraprake, ngjarja ka ndodhur rreth orës 02:45, ndërsa mjeti tip “Ford Fiesta” ishte i parkuar pranë banesës së tij. Zjarri është konstatuar nga banorët e zonës, të cilët kanë njoftuar menjëherë shërbimin zjarrfikës.

Forcat zjarrfikëse kanë ndërhyrë për të shuar flakët, por automjeti ka pësuar dëme të mëdha. Vetë gazetari ka bërë të ditur se është njoftuar rreth orës 03:00 nga një banor i pallatit dhe se makina ndodhej rreth 30 metra larg banesës. Fatmirësisht, nuk raportohen dëmtime në automjete të tjera përreth.

Shkaqet e zjarrit mbeten ende të paqarta, por paraprakisht dyshohet për zjarrvënie të qëllimshme. Gazetari Curri ka ngritur dyshime se ngjarja mund të lidhet me aktivitetin e tij profesional, pasi prej rreth 10 vitesh ai mbulon çështje që lidhen me prokurimet publike, pushtetin vendor dhe sistemin e drejtësisë në qarkun Dibër.

Policia ka mbërritur në vendngjarje dhe, nën drejtimin e Prokurorisë, po vijon hetimet për zbardhjen e plotë të rrethanave, identifikimin dhe vënien para përgjegjësisë ligjore të autorëve. Ngjarja ka shkaktuar shqetësim në komunitet dhe ka rikthyer vëmendjen mbi sigurinë e gazetarëve gjatë ushtrimit të detyrës.