Kryeministri Edi Rama ka theksuar se siguria ushqimore mbetet një nga prioritetet kryesore në rrugën e Bashkimi Europian, duke e lidhur drejtpërdrejt me procesin e integrimit të vendit.

Gjatë podcastit “Flasim”, ai bëri të ditur se ka zhvilluar një takim me përfaqësues të sipërmarrjes ushqimore, ku në fokus ka qenë garantimi i produkteve të sigurta për konsum dhe përgatitja e tyre për të konkurruar në tregun europian.

Sipas Ramës, ky proces nuk kufizohet vetëm në përmbushjen e standardeve ligjore, por kërkon ndërtimin e një sistemi të plotë kontrolli dhe cilësie në gjithë zinxhirin ushqimor, nga prodhimi deri te tregtimi.

Ai theksoi se sfida kryesore mbetet mbështetja e bizneseve që operojnë në sektorët e bujqësisë dhe përpunimit ushqimor, duke përfshirë produktet shtazore dhe ato të paketuara.

Kryeministri shtoi se Shqipëria po punon paralelisht për harmonizimin e legjislacionit me standardet e BE-së dhe për zbatimin e tyre konkret në praktikë, përmes bashkëpunimit më të ngushtë me sipërmarrësit dhe aktorët e tregut.