Sali Berisha ka përjashtuar nga gara për drejtimin e Partisë Demokratike në Korçë Bravald Xhafkën, një figurë që më herët ka mbajtur postin e sekretarit organizativ në degën lokale të partisë.
Xhafka iu bashkua më 10 janar 2026 grupimit të njohur si “Foltorja” e Ervin Salianjit, ku kritikoi drejtimin aktual të PD-së, duke deklaruar se partia “nuk është muze, por shpresa e shqiptarëve”.
Më 3 prill ai shpalli publikisht kandidaturën për kreun e PD-së Korçë, duke prezantuar edhe programin e tij për riorganizimin e degës lokale. Megjithatë, sipas burimeve brenda strukturave të PD-së në juglindje, kandidatura e tij u shoqërua me përçarje dhe debate të brendshme për ndikimin e grupimeve rivale në këtë proces.
Fillimisht gara për drejtimin e degës ishte parashikuar të zhvillohej këtë të dielë, por u shty për në 3 maj. Nga katër kandidatë të deklaruar, tashmë kanë mbetur vetëm dy: Harito Zoto dhe Irvin Bode, i cili konsiderohej si rivali kryesor i Xhafkës në këtë garë.
