Ilir Meta është shfaqur për herë të parë në publik pas rreth 18 muajsh paraburgim, gjatë seancës së parë gjyqësore ku ai dhe të pandehurit e tjerë po përballen me procesin në themel.

Pamjet e transmetuara online e kanë treguar ish-presidentin të ndryshuar në pamje fizike, me rënie në peshë, ndërsa ai u paraqit pas kafazit të xhamit në sallën e gjyqit, i shoqëruar nga ish-bashkëshortja Monika Kryemadhi dhe avokati Kujtim Cakrani.

Ndryshimi i tij fizik ka tërhequr vëmendje të madhe, ndërsa përfaqësuesi i Komitetit Shqiptar të Helsinkit, Zylyftar Bregu, ka dhënë disa detaje mbi jetën e Metës në paraburgim gjatë një interviste televizive.

Sipas tij, Meta qëndron i vetëm në qeli dhe ndjek një regjim të kufizuar ushqimor, pasi refuzon ushqimin e burgut dhe konsumon vetëm ushqim të sjellë nga familjarët një herë në javë. Bregu shtoi gjithashtu se ish-presidenti është ankuar për kufizime në kohën e ajrimit dhe mungesën e ekspozimit të mjaftueshëm në diell.

Ai theksoi se kushtet në të cilat Meta po mbahet janë strikte, pjesë e masave të sigurisë të vendosura nga autoritetet e burgjeve, duke shtuar se këto faktorë mund të kenë ndikuar në gjendjen e tij fizike gjatë kësaj periudhe të gjatë izolimi.