Sekretari i Përgjithshëm i Partisë së Lirisë, Tedi Blushi, ka deklaruar se ish-presidenti Ilir Meta gëzon gjendje të mirë shëndetësore dhe nuk ka asnjë shqetësim fizik, duke i cilësuar akuzat ndaj tij si të pabazuara.

“Zoti Meta është në gjendje shumë të mirë shëndetësore. Parametrat e tij janë normalë dhe nuk ka asnjë problem. Çdo gjë tjetër që thuhet nuk është e vërtetë”, u shpreh Blushi.

Ai shtoi se hetimet dhe akuzat ndaj Metës nuk mbështeten në prova konkrete dhe, sipas tij, janë rezultat i një fushate politike.

“Janë bërë hetime, janë dërguar kërkesa në shumë vende, por nuk është gjetur asgjë që mbështet akuzat. Kjo tregon qartë se çështja është e stisur”, deklaroi ai.

Blushi përmendi gjithashtu se Meta është aktiv dhe në formë të mirë fizike, duke theksuar se merret edhe me sport, përfshirë ping-pongun.