Kryetari i Bashkisë së Mançesterit të Madh, Andy Burnham, po përgatit një rikthim të mundshëm në Westminster brenda disa javësh, sipas aleatëve të tij, në një lëvizje që mund të riformësojë garën për drejtimin e Labour Party.

Sipas raportimeve të “The Guardian”, Burnham pritet të përdorë një zgjedhje të pjesshme për të testuar mbështetjen dhe për të avancuar një platformë të re politike që synon, sipas tij, “riorganizim rrënjësor” të qeverisjes në Mbretërinë e Bashkuar.

Ai më herët ishte penguar nga strukturat drejtuese të partisë për të kandiduar në zgjedhjet e shkurtit në Gorton dhe Denton, por tani ekipi i tij pretendon se ka identifikuar zona ku deputetë aktualë mund të tërhiqen, duke hapur rrugën për kandidimin e tij.

Aleatët e Burnham thonë se ai po përgatit një paketë reformash që përfshin ndryshime në sistemin zgjedhor dhe një plan 10-vjeçar për rritje ekonomike, që mund të prezantohet në javët në vijim.

Në prapaskenë, po flitet edhe për një riorganizim të mundshëm të ekzekutivit në rast se ai arrin të sfidojë lidershipin aktual të kryeministrit Keir Starmer. Në skenarët e diskutuar, figura të larta si Ed Miliband dhe Angela Rayner mund të marrin role të rëndësishme në një qeveri të mundshme të re.

Burnham, i njohur për qëndrimet e tij mbi reformimin e shërbimeve publike dhe decentralizimin, po përgatit gjithashtu propozime për përfaqësim proporcional dhe rishikim të taksës së trashëgimisë për të financuar sistemin e kujdesit social, duke sinjalizuar një platformë më të gjerë politike në rast rikthimi në parlament.