Kryebashkiaku i burgosur i Stamboll, Ekrem İmamoğlu, ka reaguar ashpër ndaj deklaratave të Presidentes së Komisionit Evropian, Ursula von der Leyen, duke kundërshtuar krahasimin e Turqisë me Rusinë dhe Kinën.

Në një artikull opinioni të publikuar në Politico, İmamoğlu thekson se “vendosja e Turqisë në të njëjtin nivel me Rusinë dhe Kinën është kundër realiteteve gjeopolitike dhe interesave strategjike të BE-së”.

Ai pranon gjithashtu se qeveria turke po “minon sundimin e ligjit dhe të drejtat themelore”, por njëkohësisht kritikon Bashkimin Evropian për mungesë koherence në raport me Ankaranë. Sipas tij, BE-ja po luhatet “midis parimeve dhe interesave”, duke dështuar të artikulojë një vizion të qartë strategjik për marrëdhëniet me Turqinë.

Kryebashkiaku i Stambollit i bën thirrje Brukselit që të angazhohet më thellë me realitetet shoqërore dhe historike të vendit të tij, duke kërkuar që Turqia të mos shihet “përmes prizmit të frikës, klisheve dhe llogaritjeve politike afatshkurtra”.

Reagimi i tij vjen pas një deklarate të fundit të Von der Leyen, e cila kishte theksuar se “Evropa duhet të përfundojë integrimin e saj për të mos rënë nën ndikimin rus, turk apo kinez”.

Deklaratat e saj u kritikuan edhe nga Charles Michel, i cili e cilësoi Turqia si një “aleat kyç të NATO” dhe një partner të rëndësishëm në çështjet e migracionit.

İmamoğlu, një nga kundërshtarët kryesorë politikë të Recep Tayyip Erdoğan, thekson se pavarësisht tensioneve, ai nuk e ka humbur besimin në perspektivën evropiane të vendit të tij. Megjithatë, ai mban përgjegjëse si Ankaranë, ashtu edhe Brukselin për zvarritjen e gjatë të procesit të anëtarësimit në BE.