Një grup banorësh nga zona e ish-Kënetës janë mbledhur mbrëmjen e sotme pranë Bashkia e Durrësit, ku kanë ndezur qirinj në kujtim të dy të miturve që humbën jetën në aksidentin tragjik të së dielës.

Karvani i makinave që shoqëronte qytetarët bllokoi përkohësisht një korsi qarkullimi në aksin përballë Sheshi Liria, përpara se të ndalej në shkallët e bashkisë, aty ku u zhvillua edhe ceremonia simbolike.

Mes heshtjes dhe dhimbjes, qytetarët ndezën qirinj dhe mbajtën një minutë heshtje në nder të dy fëmijëve, të moshës 9 dhe 12 vjeç, të cilët humbën jetën tragjikisht ndërsa po luanin në trotuarin pranë banesave të tyre.

Pavarësisht pranisë së mediave, banorët zgjodhën të mos japin deklarata publike. Megjithatë, ata bënë me dije se marshimi i paralajmëruar për ditën e nesërme pritet të jetë masiv, në shenjë reagimi qytetar ndaj ngjarjes së rëndë që ka tronditur mbarë opinionin publik.