Presidentja e Bullgarisë, Iliana Yotova, ka bërë të ditur se më 7 maj do t’i japë mandatin për formimin e qeverisë së re partisë fituese të zgjedhjeve parlamentare, Bullgaria Progresive (PB), e drejtuar nga ish-presidenti Rumen Radev.

Sipas deklaratës së saj, Yotova tha se partia ka konfirmuar gatishmërinë për të propozuar një kabinet qeveritar dhe pritet që më 8 maj parlamenti të votojë për dhënien e besimit qeverisë së re.

Bullgaria Progresive doli forcë e parë në zgjedhjet e fundit parlamentare, duke siguruar 44.6% të votave dhe duke fituar një shumicë të mjaftueshme për të shmangur nevojën e koalicioneve me parti të tjera. Kjo rezultat i jep fund një periudhe të gjatë paqëndrueshmërie politike në vend, gjatë së cilës janë mbajtur tetë palë zgjedhje brenda pesë viteve.

Rumen Radev, i cili pritet të drejtojë ekzekutivin e ri, njihet për qëndrimet e tij euroskeptike dhe për kundërshtimin e zgjerimit të mbështetjes ushtarake për Ukrainën në luftën ndaj Rusisë.

Ai dha dorëheqjen nga posti presidencial në janar për të hyrë në garën parlamentare, pas krizës politike që pasoi dorëheqjen e qeverisë së mëparshme si rezultat i protestave masive në dhjetor.

Zhvillimi i fundit shënon një fazë të re në skenën politike bullgare, me pritshmëri të larta për stabilitet institucional pas një periudhe të gjatë krizash qeverisëse.