Një ngjarje e rëndë është regjistruar në zonën e Gazi-t, në Heraklion, ku një 20-vjeçar është vrarë me armë zjarri në mes të rrugës, duke tronditur komunitetin lokal dhe autoritetet greke.

Sipas raportimeve nga mediat greke, autori i dyshuar është një 54-vjeçar, i cili pas ngjarjes është dorëzuar vetë në polici dhe ka dorëzuar edhe armën e përdorur në krim.

Hetimet paraprake sugjerojnë se ngjarja lidhet me një konflikt të hershëm, që ka nisur rreth tre vite më parë, kur djali i 54-vjeçarit humbi jetën në një aksident rrugor. Në atë aksident, i riu që u vra sot dyshohet se ka qenë drejtuesi i mjetit, ndërsa viktima ishte pasagjer.

Burime hetimore bëjnë me dije se autori e ka konsideruar 20-vjeçarin përgjegjës për vdekjen e të birit dhe dyshohet se e ka ndjekur me makinë përpara se ta qëllonte disa herë në rrugë.

Pas krimit, 54-vjeçari është paraqitur në polici dhe është arrestuar menjëherë. Autoritetet greke kanë nisur hetimet për të sqaruar plotësisht rrethanat e ngjarjes dhe motivet që çuan në këtë akt fatal.

Ngjarja ka shkaktuar reagime të forta në Greqi, duke rikthyer në vëmendje debatet mbi hakmarrjen dhe dhunën e lidhur me konflikte të vjetra personale.