Nënkryetari i Lidhjes Demokratike të Kosovës (LDK), Lutfi Haziri, ka deklaruar se vendi po përballet me një krizë të thellë politike dhe mungesë të bashkëpunimit institucional, e cila sipas tij po ndikon drejtpërdrejt në funksionimin e shtetit.

Në një intervistë për “Ballkan Update”, Haziri tha se Kosova ka hyrë në një “qark të mbyllur politik”, që po e dëmton zhvillimin dhe stabilitetin institucional.

Sipas tij, LDK pritet që brenda kësaj jave të bëjë të qarta angazhimet e saj politike, përfshirë edhe listat për Kuvendin dhe kapacitetet ekzekutive, ndërsa kryetari i partisë, Lumir Abdixhiku, është në komunikime intensive për këtë proces.

“Qëllimi politik është që Kosova të thyejë qarkun prej dy vitesh. Mungesa e vullnetit politik për bashkëpunim kulmon me moskandidimin e Osmanit për presidente. Ditët e ardhshme do të ketë lajme të mira ku po ndërtohet një listë garuese për të kthyer besimin dhe shpresën e publikut”, tha Haziri.

Ai shtoi se vendi po përballet me pasoja të vazhdueshme politike, duke e cilësuar situatën si të rënduar dhe të përsëritur. Sipas tij, mungesa e zgjidhjeve institucionale po e mban Kosovën në një cikël krizash.

Haziri komentoi gjithashtu edhe zhvillimet e ardhshme zgjedhore, duke theksuar se ato do të jenë një garë e fortë politike.

“Këto zgjedhje do të jenë një garë mes elefantësh. Kurti dhe Osmani do të jenë ata që do të mobilizojnë më shumë votuesit”, u shpreh ai.

Ndër të tjera, Haziri ngriti shqetësime edhe për mënyrën e funksionimit të sistemit politik, duke thënë se vendi ndodhet në një fazë të ndjeshme, ku sipas tij po krijohen forma të reja të menaxhimit të situatës sociale dhe politike.