Armëpushimi mes Shteteve të Bashkuara dhe Iranit vijon të mbetet në fuqi, pavarësisht përshkallëzimit të veprimeve ushtarake në zonën strategjike të Ngushticës së Hormuzit, ka deklaruar shefi i Pentagonit, Pete Hegseth.

Në një deklaratë për mediat të martën, Hegseth tha se vendimi për përfundimin ose jo të armëpushimit do t’i takojë presidentit amerikan Donald Trump, duke lënë të hapur mundësinë e reagimeve të mëtejshme nëse situata përshkallëzohet.

Sipas tij, Uashingtoni mund të tolerojë disa incidente të izoluara gjatë përpjekjeve për të siguruar rihapjen e korridoreve detare në Hormuz, një nga rrugët më të rëndësishme të transportit të naftës në botë.

Sekretari amerikan i Mbrojtjes theksoi se operacioni amerikan për garantimin e lirisë së lundrimit, i quajtur “Project Freedom”, është një mision i veçantë dhe nuk lidhet drejtpërdrejt me fushatën më të gjerë SHBA–Izrael kundër Iranit, e koduar “Epic Fury”.

“Armëpushimi nuk ka përfunduar. Prisnim që në fillim të kishte përplasje të izoluara dhe kjo ka ndodhur. Ne jemi përgjigjur në mënyrë agresive dhe të plotë”, u shpreh Hegseth.

Ai shtoi se Irani është në dijeni të qëndrimit amerikan dhe se çdo përshkallëzim i mëtejshëm do të vlerësohet nga presidenti si shkelje e mundshme e marrëveshjes së armëpushimit.

E hëna u shënua si një nga ditët më të tensionuara që prej hyrjes në fuqi të armëpushimit më 8 prill, me incidente të shumta të raportuara nga të dyja palët.

Sipas burimeve ushtarake, Irani ka deklaruar se ka qëlluar ndaj anijeve të Marinës amerikane, ndërsa SHBA pretendon se ka rrëzuar mjete të vogla iraniane në rajon. Po ashtu, janë raportuar sulme me dronë dhe raketa ndaj Emirateve të Bashkuara Arabe.

Situata është shoqëruar edhe me viktima dhe të plagosur. Autoritetet në Emiratet e Bashkuara Arabe raportuan tre të plagosur në një sulm në zonën e industrisë së naftës në Fujairah, ndërsa Teherani pretendon se një sulm amerikan ndaj një anijeje pasagjerësh në Gjirin Persik ka shkaktuar pesë viktima civile.