Një ngjarje tragjike është regjistruar mëngjesin e sotëm në Devoll, ku një 60-vjeçar nga fshati Kurilë është gjetur i pajetë në një lumë pranë fshatit Vishocicë.

Sipas informacioneve paraprake, viktima kishte shkuar për vizitë tek disa të afërm dhe kishte qëndruar deri në orët e vona në një lokal të zonës. Dyshohet se, gjatë kthimit për në banesë, ai ka humbur ekuilibrin teksa kalonte mbi një urë dhe ka rënë aksidentalisht në lumë.

Burime nga grupi hetimor bëjnë me dije se 60-vjeçari dyshohet të ketë qenë nën efektin e alkoolit në momentin e ngjarjes, bazuar edhe në dëshmitë e personave që kanë qenë me të në lokal.

Policia ka kryer kqyrjen e vendit të ngjarjes dhe paraprakisht dyshohet për një aksident fatal, ndërsa pritet ekspertiza mjeko-ligjore për të përcaktuar shkakun e saktë të vdekjes.

Hetimet për rastin vijojnë.