Ndërsa Organizata Botërore e Shëndetësisë vijon hetimet për origjinën e mutacionit “Andean” të hantavirusit, jeta në anijen turistike MV Hondius po zhvillohet mes frikës dhe pasigurisë.

Anija, e cila kishte nisur si një udhëtim turistik në zonat e largëta të Atlantikut Jugor dhe Amerikës së Jugut, është kthyer në qendër të një krize shëndetësore ndërkombëtare, pas raportimeve për raste të konfirmuara dhe të dyshuara me infeksion.

Në bord ndodhen 149 pasagjerë nga 23 vende, të vendosur në regjim të rreptë kontrolli, ndërsa ekipe mjekësore dhe ekspertë të veshur me pajisje mbrojtëse po monitorojnë situatën dhe po kryejnë dezinfektim të hapësirave.

Pasagjerëve u është kërkuar të qëndrojnë në kabina, të përdorin masa mbrojtëse dhe të kufizojnë kontaktet, duke rikthyer një atmosferë të ngjashme me periudhën e pandemisë globale.

Ngjarja ka marrë jehonë të gjerë edhe në rrjetet sociale, ku disa pasagjerë dhe influencues kanë raportuar për ankth dhe pasiguri, ndërsa autoritetet përpiqen të shmangin panikun dhe dezinformimin.

Sipas hetimeve paraprake, shpërthimi dyshohet të ketë nisur pas kontaktit me brejtës gjatë ndalesave në zona rurale të Argjentina, ku ky lloj virusi është i njohur në disa shpërthime të mëparshme.

Autoritetet shëndetësore theksojnë se, pavarësisht rasteve të raportuara, rreziku për një emergjencë globale mbetet i ulët, por situata vijon të monitorohet nga afër për shkak të natyrës potencialisht të rrezikshme të virusit.