Familjarë, akademikë dhe përfaqësues të artit shqiptar i dhanë këtë të diel lamtumirën e fundit aktorit të njohur Birçe Hasko, në një ceremoni homazhi të zhvilluar në ambientet e Teatri Kombëtar i Operas dhe Baletit.

Nga ora 10:00 deri në 12:00 u mbajtën homazhet në nder të “Mjeshtrit të Madh”, ku dhjetëra qytetarë, kolegë dhe miq u përkulën me respekt para figurës së një prej emrave më të rëndësishëm të skenës dhe kinematografisë shqiptare. U vlerësua kontributi i tij artistik dhe ndikimi në formimin e brezave të rinj të aktorëve.

Aktori Petrit Malaj, në një deklaratë për mediat, u shpreh:
“Skena ka humbur aktorin e karaktereve… profesor Birçe Hasko ishte një nga aktorët që e njihte jetën më shumë se të gjithë. Kam ndier trishtim shumë të madh, më ka ikur një njeri që më donte dhe e doja shumë.”

Regjisori Kiço Londo tha se Hasko ishte një figurë që më shumë sesa mjeshtërinë teknike të aktrimit, përcillte njerëzoren dhe shembullin personal:
“Ishte një njeri që na mësoi njerëzoren. Nuk predikonte, udhëhiqte me shembullin e tij.”

Ndërkohë, aktori Timo Flloko vlerësoi integritetin e tij:
“Ai ishte një personalitet me integritet qytetar e njerëzor të pashembullt. Në kinematografinë shqiptare ka vendin e vet me një sërë karakteresh interesantë.”

Homazhet u mbyllën mes emocioneve dhe nderimeve për një prej figurave më të rëndësishme të artit skenik shqiptar.