Drejtoresha ekzekutive e JPMorgan Chase, Lorna Hajdini, ka reaguar ashpër ndaj akuzave të ish-bankierit Chirayu Rana, duke i cilësuar ato si tërësisht të fabrikuara dhe shpifëse. Në një kundërpadi të depozituar në Gjykatën Supreme të Nju Jorkut, Hajdini pretendon se Rana ka shpikur historinë se ajo e kishte detyruar të bëhej “skllavi i saj seksual”, me qëllim përfitimin e miliona dollarëve dhe dëmtimin e reputacionit të saj profesional. Sipas dokumenteve gjyqësore, skandali ka sjellë pasoja të rënda personale për drejtuesen shqiptare, e cila thotë se është bërë objekt sulmesh, talljesh dhe kërcënimesh online pas publikimit të akuzave.

Në dosjen gjyqësore janë zbuluar edhe mesazhe tronditëse që Hajdini ka marrë përmes emailit nga persona anonimë, me kërcënime dhe përmbajtje fyese e degraduese, përfshirë komente seksuale dhe mesazhe urrejtjeje.

Avokatët e saj deklarojnë se ajo dhe familja e saj janë përballur me ngacmime të vazhdueshme dhe përmbajtje të krijuar me inteligjencë artificiale me synim denigrimin e saj. Ata akuzojnë Ranën se ka nxitur këtë valë sulmesh përmes “gënjeshtrave” që e paraqesin atë si “grabitqare raciste dhe seksuale”.

Nga ana tjetër, Rana ka mbrojtur publikisht padinë e tij, duke argumentuar se reagimi ndaj çështjes është ndikuar nga pabarazia gjinore dhe se rasti i tij po trajtohet ndryshe për shkak të këtij aspekti.

Megjithatë, JPMorgan Chase ka mohuar kategorikisht akuzat dhe ka deklaruar se një hetim i brendshëm nuk ka gjetur asnjë provë që mbështet pretendimet e ish-bankierit. Sipas dokumenteve të burimeve njerëzore, Hajdini nuk kishte ndikim mbi bonuset apo ngritjen në detyrë të Ranës.