Gjykata e Shkodrës ka vendosur masën “arrest me burg” për 36-vjeçarin Adnan Galica, i dyshuar si shkaktar i aksidentit tragjik ku humbi jetën 62-vjeçari Shkëlqim Krasniqi, ndërsa u plagosën Fatbardh Lishi dhe dy fëmijë të mitur.

Togat e zeza nuk pranuan kërkesën e mbrojtjes për një masë më të lehtë sigurie, pavarësisht pretendimeve se i dyshuari vuan nga probleme të shëndetit mendor.

“Ka kartelë mjekësore për skizofreni dhe epilepsi”, tha avokati mbrojtës, duke kërkuar trajtim të specializuar në një institucion shëndetësor në vend të paraburgimit.

Ai shtoi se klienti i tij ka pasur edhe një aksident të rëndë në moshën 18-vjeçare, duke qëndruar për një periudhë të gjatë në koma, çka sipas tij ka ndikuar në gjendjen aktuale shëndetësore.

Në të njëjtën linjë, mjeku reanimator i Spitalit Rajonal të Shkodrës ka rekomanduar trajtim në kushte spitalore deri në sqarimin e plotë të gjendjes.

Vetë i dyshuari nuk ka dhënë asnjë deklarim gjatë seancës, ndërsa ndodhej në gjendje shoku.

Nga ana tjetër, prokuroria ka kërkuar dhe ka mbështetur masën e arrestit me burg, duke e cilësuar ngjarjen me pasoja të rënda dhe rrezikshmëri të lartë.

Sipas hetimeve paraprake, Galica dyshohet se po drejtonte automjetin me shpejtësi të lartë, duke kryer parakalime të rrezikshme, në momentin kur ndodhi përplasja fatale.