Shitësi online me origjinë kineze Temu është gjobitur me 200 milionë euro nga autoritetet rregullatore të Bashkimit Evropian, pasi akuzohet se nuk ka marrë masa të mjaftueshme për të ndaluar shitjen e produkteve të paligjshme në platformën e tij.

Sipas Komisionit Evropian, kompania ka dështuar të identifikojë dhe vlerësojë si duhet rreziqet sistemike që lidhen me produktet e ndaluara dhe dëmin e mundshëm për konsumatorët në BE. Hetimi është zhvilluar për gati dy vjet në kuadër të Aktit të Shërbimeve Dixhitale, i cili kërkon nga platformat e mëdha online të forcojnë kontrollin mbi përmbajtjen dhe produktet e paligjshme.

Rregullatorët kanë theksuar gjithashtu se mënyra si funksionojnë sistemet e rekomandimit dhe promovimi përmes influencuesve mund të ketë përkeqësuar shpërndarjen e produkteve problematike në platformë.

Nga ana e saj, Temu e ka kundërshtuar vendimin, duke e cilësuar gjobën “joproporcionale” dhe duke theksuar se shumë nga shqetësimet lidhen me një vlerësim të vitit 2024, i cili sipas kompanisë nuk reflekton përmirësimet e mëvonshme në sistemet e saj të sigurisë dhe kontrollit. Kompania ka bërë të ditur se do të vazhdojë bashkëpunimin me institucionet europiane, por po shqyrton edhe hapat ligjorë të mëtejshëm.