Një aksident tragjik ka ndodhur në Patra të Greqisë, ku një 20-vjeçar dhe babai i tij 46-vjeçar kanë humbur jetën pasi motori me të cilin po udhëtonin doli nga rruga dhe u përplas me barrierat mbrojtëse.

Sipas informacioneve paraprake, përplasja ka qenë e fortë, duke bërë që mjeti të përmbyset.

20-vjeçari ndërroi jetë në vendngjarje si pasojë e plagëve të rënda që mori nga aksidenti, ndërsa babai i tij u transportua me urgjencë në Spitalin Universitar të Patrës në Rio.

Pavarësisht përpjekjeve të mjekëve për ta mbajtur në jetë, 46-vjeçari nuk arriti t’u mbijetojë plagëve dhe ndërroi jetë pak më vonë në spital.

Autoritetet greke kanë nisur hetimet për të zbardhur rrethanat e plota dhe shkaqet e aksidentit fatal që i mori jetën babait dhe djalit.