Joe Jonas ka folur hapur për marrëdhënien që vazhdon të ketë me ish-bashkëshorten e tij, Sophie Turner, duke vlerësuar mënyrën se si të dy po menaxhojnë bashkëprindërimin pas ndarjes.

Gjatë një episodi të podcast-it të tij, ku ishte i ftuar së bashku me vëllezërit e tij, Nick Jonas dhe Kevin Jonas, artisti u shpreh se ndihet mirënjohës për bashkëpunimin që ka me nënën e fëmijëve të tij.

“Jam një baba beqar dhe bashkë-prindëroj me nënën e fëmijëve të mi”, tha Jonas, duke theksuar se mbështetja dhe komunikimi mes tyre e kanë bërë më të lehtë përballimin e sfidave të përditshme.

Këngëtari shtoi se ndihet me fat që ka një bashkëprind me të cilin mund të ruajë ekuilibrin në jetën familjare, edhe në periudhat më të vështira.

Joe Jonas dhe Sophie Turner u martuan në vitin 2019 në Las Vegas dhe i dhanë fund martesës së tyre pas katër vitesh. Pas ndarjes, çifti u përfshi në një proces ligjor lidhur me kujdestarinë e fëmijëve, por më vonë arritën një marrëveshje, duke zgjidhur mosmarrëveshjet dhe duke u fokusuar te mirëqenia e vajzave të tyre.

Sot, pavarësisht ndarjes, të dy duket se kanë ndërtuar një raport të qëndrueshëm si prindër, duke vendosur fëmijët në qendër të prioriteteve të tyre.