Në mënyrë tragjike ka humbur jetën në moshën 22-vjeçare futbollisti i AF Elbasanit, Fatjon Bunjaku, si pasojë e një aksidenti rrugor të ndodhur në magjistralen Prishtinë–Mitrovicë, pak pas mesnate.

Lajmi është konfirmuar nga mediat në Kosovë, të cilat kanë bërë publike edhe detajet e para të aksidentit fatal që i mori jetën të riut.

Fatjon Bunjaku konsiderohej një nga talentet premtuese të futbollit kosovar, me një karrierë në rritje dhe me eksperiencë edhe në nivelet përfaqësuese, ku kishte qenë pjesë e ekipit U-21.

Pas një aventure me skuadrën e Malishevës, ai iu bashkua në korrik të vitit 2025 ekipit të AF Elbasanit, ku ishte një nga lojtarët kyç të skuadrës në garën për titull kampion deri në javët e fundit të sezonit.

Humbja e tij e parakohshme ka tronditur futbollin shqiptar dhe komunitetin sportiv në Kosovë e Shqipëri, duke lënë pas dhimbje dhe reagime të shumta për ndarjen e tij nga jeta në një moshë kaq të re.