Një operacion antidrogë pranë kufirit greko-shqiptar ka çuar në sekuestrimin e mbi 109 kilogramëve lëndë narkotike dhe arrestimin e një shtetasi turk, i dyshuar si pjesë e një rrjeti të trafikut ndërkombëtar.

Sipas informacioneve hetimore, autoritetet greke ndaluan një automjet tip “BMW” në zonën e Nea Selefkiës, pak para hyrjes në qytetin e Igumenicës. Në timon ndodhej një shtetas turk 43-vjeçar, i cili dyshohet se ishte angazhuar nga një grup kriminal për transportimin e drogës drejt Athinës.

Nga hetimet paraprake rezulton se lënda narkotike dyshohet të ketë hyrë në territorin grek nga Shqipëria, përmes zonës së Sarandës dhe fshatrave të Konispolit, duke përdorur kufirin e gjelbër për të shmangur kontrollet.

Gjatë kontrollit të automjetit, policia zbuloi 109 kilogramë e 364 gramë lëndë narkotike, të ndara në 102 pako dhe të fshehura në çanta sportive me ngjyrë të zezë.

Autoritetet po vijojnë hetimet për të identifikuar dhe lokalizuar personat e tjerë që dyshohet se janë të përfshirë në këtë rrjet të trafikut të drogës, si dhe për të dokumentuar të gjithë itinerarin e transportit të lëndës narkotike.