Një ngjarje e rëndë është shënuar mëngjesin e sotëm në Mirditë.

Rreth orës 07:10, në fshatin Shkorrët, përgjatë rrugës Reps–Spaç, është gjetur i vrarë me armë zjarri një person brenda automjetit me të cilin po udhëtonte.

Viktima është identifikuar si Valter Lleshi, rreth 45 vjeç.

Sipas të dhënave paraprake nga policia, ai është gjetur pa shenja jete në një automjet tip Toyota.

Lleshi ishte punonjës i një kompanie që operon në zonën e Spaçit. Në mars të këtij viti, po kësaj kompanie i ishte vendosur një sasi tritoli në një makineri pune, e cila fatmirësisht nuk kishte shpërthyer.

Sipas hetimeve paraprake, viktima është qëlluar me breshëri automatiku teksa po shkonte në punë. Në vendngjarje janë gjetur rreth 18 gëzhoja, ndërsa trupi i pajetë është konstatuar nga një tjetër punëtor që po udhëtonte në të njëjtin segment rrugor dhe ka njoftuar menjëherë policinë.

Forcat e rendit kanë mbërritur në vendngjarje dhe kanë nisur kontrollet në zonë për identifikimin dhe kapjen e autorit ose autorëve të dyshuar. Është ngritur gjithashtu një grup i posaçëm hetimor, i cili nën drejtimin e Prokurorisë po punon për mbledhjen e provave dhe zbardhjen e plotë të rrethanave të ngjarjes.

Hetimet vijojnë, ndërsa një nga pistat e mundshme lidhet me konflikte të mëparshme kriminale.