Një aksident rrugor është regjistruar këtë të mërkurë në autostradën Fier–Lushnjë, në zonën e rrethrrotullimit të Kolonjës, në kahun e lëvizjes drejt Lushnjës.

Sipas informacioneve paraprake, një mjet tip fuoristradë është përplasur me forcë nga pas me një kamionçinë. Përplasja ka qenë e fortë, duke shkaktuar plagosjen e dy personave që udhëtonin në fuoristradë.

Të lënduarit janë transportuar me ambulancë drejt Spitalit të Lushnjës, ku po marrin ndihmën e nevojshme mjekësore. Burime nga spitali bëjnë me dije se ata ndodhen nën kujdesin e mjekëve dhe, fatmirësisht, janë jashtë rrezikut për jetën.

Në vendngjarje kanë mbërritur shërbimet e Policisë Rrugore, të cilat kanë kryer veprimet procedurale për dokumentimin e aksidentit dhe po punojnë për zbardhjen e plotë të rrethanave të ngjarjes.

Sipas të dhënave të para, dyshohet se shkak i aksidentit ka qenë shpejtësia e lartë me të cilën po lëvizte fuoristrada, e cila në hyrje të rrethrrotullimit ka goditur nga pas kamionçinën. Autoritetet vijojnë hetimet për të përcaktuar shkaqet e sakta të përplasjes.