Një aksident rrugor është regjistruar këtë të martë në aksin Gjirokastër–Tepelenë, në kthesën pranë ish-Divizionit, aty ku ndodhet aktualisht Drejtoria e Policisë Kufitare.

Në ngjarje janë përfshirë dy autovetura dhe një fuoristradë, të cilat janë përplasur mes tyre për shkaqe që ende nuk janë bërë të ditura.

Fatmirësisht, nga aksidenti nuk raportohet për persona të lënduar, ndërsa përplasja ka shkaktuar vetëm dëme materiale në automjetet e përfshira.

Menjëherë pas sinjalizimit, në vendngjarje kanë mbërritur shërbimet e Policisë, të cilat kanë kryer veprimet e para procedurale dhe po punojnë për zbardhjen e plotë të rrethanave dhe shkaqeve të aksidentit.