Prej 12 ditësh, 34-vjeçari Eglant Koçi vijon të rezultojë i zhdukur, ndërsa ende nuk ka asnjë gjurmë për vendndodhjen e tij.

Bazuar në provat e mbledhura, Policia e Tiranës ka deklaruar pak ditë pas zhdukjes se Koçi dyshohet se është eliminuar fizikisht nga miku i tij, 41-vjeçari Armand Shakaj.

Autori i dyshuar i kësaj ngjarjeje të rëndë vijon të jetë në kërkim, ndërsa për arrestimin e tij janë angazhuar jo vetëm strukturat e Policisë së Tiranës, por edhe forca të tjera policore në të gjithë vendin. Kërkimet janë shtrirë në disa zona, ku po vijon një punë intensive hetimore me metoda speciale për lokalizimin dhe kapjen e tij.

Sipas burimeve, arrestimi i Shakajt do t’i hapte rrugë edhe gjetjes së trupit të 34-vjeçarit, i cili dyshohet se është fshehur në periferi të Tiranës. Pavarësisht kontrolleve të shumta në terren, deri tani nuk është gjetur asnjë gjurmë e viktimës.

Burime policore bëjnë me dije se 41-vjeçari vijon të fshihet brenda territorit të vendit dhe dyshohet se ka ndryshuar plotësisht pamjen e tij për t’iu shmangur identifikimit. Ai dyshohet se ka prerë flokët, ka hequr mjekrën dhe përdor metoda maskimi gjatë lëvizjeve.

Hetuesit dyshojnë gjithashtu se ai mban kontakte me persona të afërt që mund ta ndihmojnë në fshehje. Po ashtu, ai ka ndryshuar numrin dhe aparatin celular për të shmangur gjurmimin përmes IMEI-t, ndërsa dyshohet se përdor edhe karta SIM me numra të huaj për të mos u lokalizuar.

Hetimet vijojnë.