Një ngjarje e pazakontë ka ndodhur në Torino të Italisë, ku një 46-vjeçar me origjinë nga Peruja u arrestua pasi u kap duke hyrë pa leje në banesën e një gruaje. Ajo që e bën edhe më të çuditshëm rastin janë versionet diametralisht të kundërta të dy palëve për marrëdhënien mes tyre.

“Unë nuk jam hajdut. Ajo zonja atje është e fejuara ime, madje pret edhe një fëmijë nga unë”, deklaroi 46-vjeçari para gjykatës, duke mohuar akuzat për tentativë vjedhjeje.

Ngjarja ndodhi të shtunën në mbrëmje në lagjen Barriera di Milano, në Torino. Gruaja telefonoi menjëherë policinë pasi konstatoi se burri po hynte në banesë nga dera e ballkonit, pasi kishte shqyer rrjetën kundër mushkonjave.

Në dëshminë e saj, ajo mohoi kategorikisht të kishte një lidhje me të.

“Ai është koleg i ish-partnerit tim”, u tha gruaja forcave të rendit.

Sipas mediave italiane, 46-vjeçari pretendoi se kishte kaluar mbrëmjen me një mik dhe, pas konsumimit të alkoolit, vendosi të shkonte për të fjetur në shtëpinë e gruas, të cilën ai e konsideron të fejuarën e tij.

“E kam telefonuar shumë herë në celular për t’i thënë se po kthehesha, por nuk më përgjigjej. Prandaj u përpoqa të hyja. Nuk doja të merrja asgjë nga shtëpia. Thjesht po kthehesha për të fjetur, siç kam bërë edhe herë të tjera”, u shpreh ai në sallën e gjyqit.

Përveç akuzës për tentativë vjedhjeje, ai akuzohet edhe për kundërshtim të një zyrtari publik. Sipas hetuesve, gjatë arrestimit ai u kishte thënë karabinierëve në spanjisht:

“Po ju mbaj nën vëzhgim, do të shihemi jashtë.”

46-vjeçari e mohoi edhe këtë episod.

“Nuk më kujtohet ta kem thënë këtë. Më kujtohet vetëm që më thoshin ‘Firmos, firmos’, por unë nuk doja, sepse nuk jam hajdut”, deklaroi ai.

Ai tregoi edhe një plagë në bark, duke pretenduar se ishte lënduar gjatë arrestimit.

“E shihni? Kur më arrestuan, më rrëzuan përtokë dhe u lëndova. Prandaj isha i shqetësuar. Është hera e parë që gjendem në një situatë të tillë. E pranoj se kisha pirë pak alkool. Kërkoj falje për gjithçka”, tha ai.

Në përfundim të seancës, gjyqtari vendosi ta lirojë 46-vjeçarin, duke refuzuar kërkesën e prokurorisë për masën e detyrimit të paraqitjes. Megjithatë, ai mbetet nën akuzë për tentativë vjedhjeje dhe kundërshtim të zyrtarit publik, ndërsa çështja do të shqyrtohet në gjykim në ditët në vijim.