Dhomat e Specializuara të Kosovës në Hagë kanë caktuar datën e shpalljes së aktgjykimit për katër ish-udhëheqësit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.
Sipas njoftimit zyrtar të gjykatës, vendimi do të shpallet më 16 shtator 2026, në orën 10:00, pas një procesi të gjatë gjyqësor që ka zgjatur disa vite.
Trupi Gjykues bëri me dije se afati për marrjen e vendimit u shty për shkak të vëllimit të madh të provave dhe kompleksitetit të çështjes.
“Koha e nevojshme për kuvendimet ishte zgjatur në përputhje me Rregulloren, për shkak të vëllimit të madh të provave të marra dhe kompleksitetit të procesit gjyqësor, dhe kjo zgjatje përligjej nga nevoja për të bërë një vlerësim të arsyetuar, tërësor dhe të drejtë të dokumentacionit të çështjes”, thuhet në njoftimin e Dhomave të Specializuara.
Fillimisht, Trupi Gjykues kishte afat deri më 19 maj për shpalljen e aktgjykimit, por për shkak të kompleksitetit të dosjes ai u shty fillimisht deri më 20 korrik 2026 dhe tashmë është caktuar përfundimisht data 16 shtator.
Hashim Thaçi, Kadri Veseli, Jakup Krasniqi dhe Rexhep Selimi akuzohen për krime lufte dhe krime kundër njerëzimit, përfshirë vrasje, torturë dhe përndjekje, të cilat pretendohet se janë kryer gjatë viteve 1998–1999, në periudhën e luftës në Kosovë.
Të katërt ish-udhëheqësit e UÇK-së i kanë mohuar vazhdimisht akuzat dhe janë deklaruar të pafajshëm, ndërsa Prokuroria ka kërkuar që secili prej tyre të dënohet me nga 45 vite burg.
