Komisioni Evropian ka miratuar dhënien e 659 milionë eurove ndihmë shtetërore nga Gjermania për ndërtimin e katër fabrikave të prodhimit të gjysmëpërçuesve (çipave), në kuadër të përpjekjeve për të forcuar pavarësinë teknologjike të Bashkimit Evropian.

Komisionerja për Tranzicionin e Pastër, të Drejtë dhe Konkurrues, Teresa Ribera, deklaroi se mbështetja e inovacionit në sektorin e gjysmëpërçuesve do të rrisë sovranitetin teknologjik dhe konkurrueshmërinë e Evropës.

Sipas Komisionit Evropian, investimi synon të forcojë pozicionin e BE-së në zinxhirin global të prodhimit të gjysmëpërçuesve dhe të reduktojë varësinë nga tregjet e jashtme.

Në kuadër të paketës së miratuar, Gjermania do të financojë:

* 353 milionë euro për një fabrikë që do të prodhojë çipa me përbërës silici dhe karboni në Baesweiler, në landin e Renanisë Veriore-Vestfalisë;
* 214 milionë euro për prodhimin e çipave “Silicon Power MOSFETs” në Itzehoe, Schleswig-Holstein;
* 74 milionë euro për prodhimin e pajisjeve të specializuara të matjes optike dhe filmave të hollë në Weilburg, në landin Hessen;
* 18 milionë euro për dy fabrika shumë të specializuara të prodhimit të çipave në Mynih.

Projektet do të financohen në bashkëpunim mes qeverisë federale gjermane dhe autoriteteve rajonale.

Kompanitë përfituese janë angazhuar të bashkëpunojnë me universitete dhe institute kërkimore, duke kontribuar në zhvillimin e industrisë evropiane të gjysmëpërçuesve.

Bashkimi Evropian synon që deri në vitin 2030 të dyfishojë pjesën e tij në prodhimin global të çipave, nga rreth 10% aktualisht në 20%. Sipas Komisionit Evropian, deri tani shtetet anëtare kanë mbështetur projekte në këtë sektor me rreth 14 miliardë euro.

Rregullat e BE-së për ndihmën shtetërore mbeten të rrepta, me synimin për të shmangur avantazhet e padrejta konkurruese që ekonomitë më të mëdha mund të krijojnë përmes subvencioneve publike.