Një zjarr i dyshuar si i qëllimshëm ka përfshirë një grumbull traversash të vjetra prej druri, të hequra nga infrastruktura hekurudhore, në zonën e Novoselës.

Djegia e tyre shkaktoi një re të madhe tymi të zi, e cila u përhap në Njësinë Administrative Novoselë dhe në fshatrat përreth, duke krijuar shqetësim te banorët e zonës.

Në vendngjarje ndërhynë forcat zjarrfikëse, të cilat punuan për izolimin dhe shuarjen e flakëve, si dhe për normalizimin e situatës.

Sipas të dhënave paraprake, dyshohet se zjarri është vendosur qëllimisht në grumbullin e traversave të vjetra, të cilat dikur ishin pjesë e linjës hekurudhore.

Autoritetet kanë nisur verifikimet për zbardhjen e plotë të rrethanave të ngjarjes dhe identifikimin e personave përgjegjës. Deri në këto momente nuk raportohet për persona të lënduar.