Një shqiptar 33-vjeçar dhe një italian 58-vjeçar kanë rënë në prangat e karabinierëve në Itali, pasi u kapën me rreth 2 kilogramë kokainë, ndërsa gjatë kontrolleve u sekuestruan edhe rreth 37 mijë euro, të dyshuara si të ardhura nga aktiviteti kriminal.

Operacioni u zhvillua nga oficerët e njësisë operative dhe lëvizshme të Karabinierëve të San Bonifacios, të cilët i konsideronin të dy të dyshuar seriozë për veprën penale të posedimit të lëndëve narkotike me qëllim shpërndarjen.

Sipas mediave italiane, hetimi nisi në San Bonifacio, ku efektivët vunë re një person që qëndronte në një automjet të vogël të parkuar në anë të rrugës dhe po shfaqte sjellje të dyshimta. Për këtë arsye, ata vendosën ta monitoronin nga distanca.

Pak minuta më vonë, një person i dytë iu afrua automjetit, hipi për një kohë të shkurtër dhe u largua me shpejtësi, duke shtuar dyshimet e karabinierëve, të cilët ndërhynë menjëherë për të ndaluar dhe identifikuar të dy personat.

Gjatë kontrollit të automjetit u gjetën rreth 2 kilogramë kokainë, të fshehura brenda një qeseje. Më pas, kontrolli në banesën e 58-vjeçarit çoi në sekuestrimin e rreth 37 mijë eurove në para cash, të cilat dyshohet se janë përfituar nga aktiviteti i shpërndarjes së drogës.

I gjithë materiali u sekuestrua në cilësinë e provës materiale dhe iu vu në dispozicion autoriteteve gjyqësore.

Me urdhër të Prokurorisë së Veronës, shqiptari 33-vjeçar dhe italiani 58-vjeçar u arrestuan dhe u dërguan në burgun e Montorios. Më pas, autoritetet gjyqësore konfirmuan ligjshmërinë e arrestimit dhe caktuan ndaj tyre masën e sigurisë “arrest në burg”, ndërsa hetimet për çështjen vijojnë.