Ndërsa viti 2026 ka hyrë në gjysmën e dytë të tij, bota po përballet me një nga zhvillimet më të shpejta të fenomenit klimatik El Niño, i cili sipas ekspertëve pritet të ndikojë ndjeshëm në rritjen e temperaturave globale.

Një raport i publikuar nga Carbon Brief mbi gjendjen e klimës tregon se El Niño ka rritur pritshmëritë për temperatura më të larta si gjatë vitit 2026, ashtu edhe në vitin pasardhës.

Sipas të dhënave, kushtet e El Niño-s u shfaqën në muajin prill dhe arritën pragun e një fenomeni “të fortë” deri në qershor, kur indeksi Niño 3.4 arriti vlerën 1.6 gradë Celsius.

Nga 667 modelet klimatike të analizuara nga Carbon Brief, 91% parashikojnë se kulmi i këtij fenomeni më vonë gjatë vitit mund të jetë më i lartë se çdo episod i mëparshëm i fortë i El Niño-s.

Sipas vlerësimeve, mundësia që viti 2026 të tejkalojë vitin 2024 dhe të bëhet viti më i ngrohtë i regjistruar ndonjëherë është rritur në rreth 35%.

Megjithatë, parashikimi kryesor i Carbon Brief mbetet se viti 2026 do të jetë viti i dytë më i nxehtë në histori, me temperatura mesatare rreth 1.51°C mbi nivelet para-industriale.

Nëse 2026 do të vendosë një rekord të ri temperaturash do të varet nga të dhënat përfundimtare të institucioneve të ndryshme klimatike. Sipas analizave, probabilitetet ndryshojnë nga rreth dy në tre sipas të dhënave të NASA-s dhe Berkeley Earth, deri në rreth dy në dhjetë sipas ERA5 dhe një në dhjetë sipas rianalizave JRA-3Q.

Qershori më i nxehtë në Evropën Perëndimore

Muaji qershor 2026 është regjistruar si qershori më i nxehtë në historinë e matjeve për Evropën Perëndimore, gjatë një vale të fortë të të nxehtit që solli qindra rekorde të reja temperaturash.

Sipas raportit, pothuajse 9% e sipërfaqes së planetit përjetoi temperatura rekord gjatë këtij muaji.

Ekspertët vlerësojnë se ndikimi më i madh i El Niño-s do të ndihet gjatë vitit 2027. Carbon Brief parashikon që temperatura mesatare globale atë vit mund të arrijë rreth 1.7°C mbi nivelet para-industriale, duke e bërë shumë të mundshëm vendosjen e një rekordi të ri për vitin më të ngrohtë të regjistruar.