Lëvizja palestineze Hamas ka deklaruar se është e gatshme të zbatojë marrëveshjen për çarmatimin, por vetëm nëse Izraeli përmbush detyrimin për t’u tërhequr plotësisht nga Rripi i Gazës.

Deklarata u bë nga Ghazi Hamad, anëtar i ekipit negociator të Hamasit, i cili theksoi se çështja e armëve është e lidhur drejtpërdrejt me zbatimin e marrëveshjes nga pala izraelite.

“Nëse Izraeli nuk e zbaton marrëveshjen, as ne nuk do ta zbatojmë”, deklaroi Hamad, duke shtuar se dokumenti i dakordësuar përmban një dispozitë që e detyron Izraelin të përmbushë detyrimet e tij.

Sipas tij, Izraeli nuk do të ketë asnjë rol në procesin e çarmatimit. Hamad bëri të ditur se armët do të regjistrohen dhe do të ruhen nga Komiteti Kombëtar për Administrimin e Gazës, në përputhje me afatet e parashikuara në marrëveshje.

Ai zbuloi se negociatat për draftin e marrëveshjes kanë zgjatur rreth gjashtë muaj dhe janë shoqëruar me bisedime të gjata e të vështira. Sipas Hamad, Hamasi ka pranuar një sërë kompromisesh me synimin për të mbrojtur popullsinë civile palestineze.

Përfaqësuesi i Hamasit theksoi se marrëveshja përbën një paketë të pandashme, e cila përfshin përfundimin e luftës, krijimin e një administrate kombëtare për Gazën, tërheqjen e plotë të forcave izraelite, rindërtimin e territorit dhe vendosjen e forcave ndërkombëtare të stabilizimit.

Ndërkohë, përfaqësuesit e Hamasit dhe ndërmjetësit ndërkombëtarë pritet të vijojnë negociatat për përcaktimin e mekanizmave dhe afateve konkrete të zbatimit. Sipas burimeve negociatore, procesi mund të zgjasë rreth dy javë ose edhe më shumë, për shkak të detajeve teknike që mbeten ende për t’u dakordësuar.