Anëtarja e Kryesisë së Partisë së Lirisë, Miranda Rira, ka kundërshtuar draftin e reformës së re administrativo-territoriale, që parashikon shkrirjen e 15 bashkive në vend, duke ngritur shqetësime për ndikimin që kjo mund të ketë te autonomia vendore dhe afërsia e qytetarëve me institucionet.

Sipas Rirës, ndryshimet e propozuara nga Komisioni për Reformën Territoriale rrezikojnë të dobësojnë pushtetin lokal dhe të largojnë komunitetet nga procesi i vendimmarrjes.

Ajo ka kundërshtuar argumentin se krijimi i bashkive më të mëdha sjell domosdoshmërisht një administrim më efikas, duke krahasuar modelin e propozuar në Shqipëri me strukturat vendore në disa vende të Bashkimit Europian.

Sipas saj, shumë njësi vendore europiane kanë një numër më të ulët banorësh, ndërsa në Shqipëri po synohet zgjerimi i strukturave administrative me territore më të mëdha.

Rira përmendi disa prej bashkive që parashikohen të shkrihen, mes tyre Prrenjasi, Rrogozhina, Divjaka, Memaliaj, Maliqi, Cërriku dhe Patosi, duke theksuar se këto nuk janë njësi të vogla, por komunitete me mijëra banorë, histori dhe identitet të veçantë.

Ajo ngriti pikëpyetje edhe mbi mungesën e konsultimeve publike me banorët dhe këshillat bashkiakë të zonave që preken nga reforma, duke kërkuar të dijë nëse qytetarët janë pyetur për të ardhmen e institucioneve të tyre vendore.

Sipas Rirës, shkrirja e bashkive prek rreth 260 mijë banorë, të cilët sipas saj rrezikojnë të kenë më pak akses te shërbimet publike dhe institucionet vendore.

“Me këtë reformë i vihet goditje autonomisë vendore dhe decentralizimit, sepse qytetarët largohen nga qendra e vendimmarrjes”, u shpreh Miranda Rira.

Anëtarja e Partisë së Lirisë kritikoi gjithashtu mënyrën e hartimit të draftit, duke e cilësuar procesin si jo transparent dhe pa përfshirjen e mjaftueshme të komuniteteve lokale. Ajo kërkoi tërheqjen e projektit dhe rishikimin e propozimeve për bashkitë që janë pjesë e listës së shkrirjes.