Presidenti i Iranit, Masud Pezeshkian, ka mohuar zërat për një largim të mundshëm nga detyra, duke deklaruar se nuk ka ndërmend të japë dorëheqje dhe se do të vijojë të ushtrojë funksionin e tij.

Në një video të publikuar nga disa agjenci iraniane të lajmeve, Pezeshkian hodhi poshtë spekulimet që kanë qarkulluar javët e fundit për të ardhmen e tij politike.

“Nëse ndonjëherë do të vendos të largohem nga posti, do ta njoftoj zyrtarisht. Për momentin, do të qëndroj i vendosur”, u shpreh ai.

Presidenti iranian mohoi gjithashtu pretendimet për një përçarje mes tij dhe liderit suprem të Iranit, ajatollah Mojtaba Khamenei.

“Ata duan të krijojnë përshtypjen se ka një mosmarrëveshje. Lideri thotë një gjë, ndërsa ata pretendojnë se unë them diçka tjetër”, deklaroi Pezeshkian.

Videoja, e titulluar “Raport për popullin”, pritet të publikohet e plotë në ditët në vijim.

Deklaratat e presidentit vijnë në një kohë kur në media dhe rrjetet sociale kanë qarkulluar raportime të pakonfirmuara se ai po përgatitej të jepte dorëheqje. Spekulimet u intensifikuan pas ngjarjeve të fundit politike në Iran dhe deklaratave të Mohammad Baqer Kharazit, sekretarit të përgjithshëm të partisë Hezbollah në Iran dhe kunatit të Masud Khameneit.

Sipas Kharazit, Mojtaba Khamenei kishte paralajmëruar se, nëse Pezeshkian do të paraqiste një tjetër kërkesë për dorëheqje, ajo do të pranohej. Megjithatë, ai nuk dha detaje se kur apo në çfarë rrethanash ishte bërë një deklaratë e tillë.

Ndërkohë, Mojtaba Khamenei nuk është shfaqur publikisht që kur u njoftua si pasardhësi i të atit. Deri më tani janë publikuar vetëm disa deklarata me shkrim që i atribuohen atij, ndërsa nuk ka video apo regjistrime audio të verifikuara nga paraqitjet e tij publike.